論盡極品香港人﹕酒樓飯局篇

以下故事乃取材自真實經歷，如有雷同，未必巧合，可能真係講緊你！

時間﹕ XXXX年X月X日晚飯時間
地點﹕港島區某酒樓
人物﹕小明、同事甲、同事乙、同時丙


小明﹕「呢間酒樓 D 小菜好正架！大家睇下想食 D 乜。」

同事甲﹕「我個人從來唔揀飲擇食0既！食乜都冇所謂。」

同事乙﹕「我都係！」

同事丙﹕「我對食都冇乜研究0既，小明你話事啦！」

小明﹕「咁好吖！不如就叫個芝麻蝦，跟住再要個蒜香牛柳粒......」

同事甲﹕「唔好意思呀！唔記得話你知我有皮膚敏感，唔食得蝦。」

同事乙﹕「Sorry 呀！我最近都戒左牛肉......」

小明﹕「唔緊要，咁叫過第樣啦！你地想食 D 乜吖？」

同事甲﹕「其實真係冇所謂架，我淨係唔食得蝦蟹架咋！」

小明 (向同事丙說)﹕「咁不如你揀啦！」

同事丙﹕「你揀啦！你識飲識食吖嘛！」

同事甲 + 乙﹕「係呀！你發辦啦！」

小明﹕「豬應該個個都食喇啩！」

同事甲、乙、丙﹕「食！」

小明﹕「咁不如叫碟生炒排骨啦！呢度 D 生炒骨出名呀！」

同事丙﹕「咁生炒骨又好似熱氣左 D，我呢排都食左好多熱氣嘢......
                  不如叫燜排骨啦！燜排骨都好食架！」

同事甲 + 乙﹕「好呀好呀！冇所謂！」(一再強調冇所謂)

小明﹕「咁就燜排骨啦！呀！我仲想叫個鹹蛋黃炒南瓜，我上次食過，真係好得。」

同事甲、乙、丙﹕「嘩！鹹蛋黃膽固醇好高個喎！」

小明﹕「我唔怕喎！」

同事甲﹕「咁既然你想食就叫啦！不過就唔好預我喇......」(擺明想你叫過第二樣)

同事乙﹕「其實我都好少食蛋黃架...... 不過你照叫啦，我可以幫你食少少0既！」
                 (咁抵得諗，真係多謝幫忙喎！)

小明﹕「好吖！咁我照叫架喇！部長唔該落單！」

部長﹕「幾位想食 D 咩？」

小明﹕「我要個鹹蛋黃炒南瓜，另外再加個芝麻蝦、生炒骨，同埋蒜香牛柳粒，搭枱
               呢三條粉腸一人一碗白粥得喇！」


呢個故事想講乜嘢？
很多香港人常自認為人隨和，開口埋口都說「冇所謂」，以示自己不挑剔、不計較，但事實卻並非如此。扮大方不如真爽快，與其你推我讓，轉彎抹角，我寧願開門見山說個清楚，免得浪費時間，虛耗精神。